*جديدة بالعامية **للشاعر المتألق **محمود حسان**

جديدة بالعاميّة
________

الطبع مش غلّابْ
 بدليلْ بِعادك هانْ
والحبّ لو غلّابْ
أنا كنت اموت ولهانْ
أو كنت عِشت ذليل
بالأمر او مِتْهانْ
.
.
حَصْرِ الوجعْ في الحب
كِدبة كبيرة أكيد
أوجاعنا دابت فينا
وتْبسِّمِتْ في العِيد
والجرح لو يوم طاب
لازمْ في يوم هيعود
بالظبط زي اللحن
اللي هواه العود
حالِف يكرّر حُزنه
وكأنه بيه موعود
.
.
مش كل ليلة بَـدوب
وبغنّي موّالي
ولا كل ليلة بَـتُـوب
زعلانْ علَى حالي
.
أنا كل ليلة بْتُوب
لكنْ بوشّ وحيد
وان يوم لِبِستْ صليبْ
ثابتْ على التوحيد
.
.
بحلم يكون لي صحاب
وف حِسُّهُمْ خفافيش
حاسّين بأوجاعي
لكن مبيشوفونيش
ويقرّبوا بمشاعرهم
لكن ميخبطونيش
أنا ع العموم مبسوط
لو بالتّمني هعيش
مبسوط من الإهمال
من نظرة التطنيش
ديمًا أهمّ الناس
في خانة التهميش
.
.
عمري ما قلت أنا فاضل
أو قلت أني المَهْدي
 أو عشت دور النّاصح
اللي لربّك بِهْدي
لكن بفضل الله
لسّه مَـخُـنْـتِـشْ وَعْدي
.
بَدا للّي غايبة سنين
شيء مِ اللّي كان مِتخبّي
شيء من حنيني وحبّي
والدمع بيلومْ نَـفْـسُه
ازاي بِـدَفْـنُـه بَدا لْها
وإزاي حروف الشوقْ
سِـبْـتِـتْ وعزّ بَـدَلْـها
كلمةْ (دَفَنْ) إبداع
لو بس سابت دَالْها
.
#محمود_حسان